10 þúsund tonn árlega til Grimsby

Þetta verður í fimmta skiptið sem við komum undir merkjum Fiskmarkaðarins í Grimsby, en áður tókum við þátt með bæjarráðinu og í samstarfi við Hull,” segir Martyn Boyers, framkvæmdastjóri Fiskmarkaðarins í Grimsby.

„Við höfum verið á öllum IceFish-sýningunum frá því á tíunda áratug síðustu aldar, með ólíkum formerkjum, og við lítum á það sem tækifæri til að hitta fólk og byggja upp sambönd á Íslandi,” sagði hann, og bætti því við að þetta sé eina sjávarútvegssýningin sem þeir taka þátt í núna.

Á þessu ári tekur Fiskmarkaðurinn í Grimsby þátt í IceFish ásamt sveitarstjórn Norðaustur-Lincolnshire, sem hefur stutt markaðinn og lengi verið í tengslum við íslenska útflytjendur. Svæðið hefur þannig verið mikilvæg viðkomustöð fyrir ferskan fisk frá Íslandi inn á breska markaðinn.

„Við tökum við 15 þúsund tonnum af fiski árlega og 77% af því kemur frá Íslandi – þannig að þetta eru meira en 10 þúsund tonn af fiski frá Íslandi sem fer á uppboð,” sagði Martin Boyers.

„Síðasta sýningin var mjög vel heppnuð, og þessi verður það líka. Þær eru ekki haldnar nema á þriggja ára fresti þannig að alltaf gefst tími til að fylgjast með þróuninni og sjá eitthvað nýtt ásamt því að endurnýja gömul kynni og hitta nýtt fólk. Þannig að þessi viðburður er alltaf mikilvægur og ferskur. Fiskmarkaðurinn í Grimsby notar einnig vinnslukerfi frá Marel, og það gefur okkur einnig tækifæri til þess að hitta þá aftur og sjá það sem er nýjasta nýtt hjá þeim.”